卢总教识字？有冇搞错？
冇搞错！当然系冇搞错啦！随住时代嘅发展，「正字运动」嘅推进，「卢总有嘢讲」同埋「粤语协会」越来越多人认识，越来越多人加入广州话同粤文化嘅研究、推广、普及嘅行列当中，呢个正系我哋所希望嘅。不过可惜在，好多人经常写错字、乱用字，睇到人啼笑皆非，有时甚至可以用「惨不忍睹」嚟形容！卢总身为「错字误音澄教署」正字局常委，为咗改变呢种局面，觉得好有必要开一啲专题，教育各位应该点样正确用字。因此就有呢个「卢总教识字」嘅专题诞生，呢个专题将会归入去「畅谈广州话」里面，希望各位多多支持啦！
喺广州话里面，通常都比较少讲「是」，一般会讲「系」，例如「确系如此」。
有时啲人会写个「係」字－－有冇错呢？如果你通篇都系繁体字嘅话噉就冇错，否则你就系犯咗「简繁混用」嘅错误。噉即系话，「係」字乃表示「是」嘅「系」字嘅繁体。大家以后唔好再捞乱嚟用嘞！
另外一个我哋经常会用到嘅，就系个「喺」字嘞。「喺」字读「系」嘅第二声，系表示「在」嘅意思，有时啲人会用个「响」字。所以当你见到「我喺广州人」嘅时候，你会有咩感觉？「我在广州人」？咩意思啊？无厘头啰！错啰！唔系重有咩啊？
所以希望大家睇完呢篇教程之后，唔好再犯呢啲错误，唔好再周围话自己「喺广州人」，否则，人哋真系唔知你想点！
