highyun

今後，本帖將連載粵協成員發表於《南方都市報》白話廣州版嘅部分文章，歡迎各位閱讀，更歡迎各位加入我哋嘅供稿行列，共同發掘粵語嘅魅力。

highyun

扮学生（《逃学威龙》片段）

剧情：王Sir唔见咗支「善良之枪」，想周星星混入学校做卧底帮佢查失枪下落。

王Sir：冇人叫你扮教师，扮学生啫。
周星星：扮学生？！我当年就系因为最憎读书所以先加入警队㗎（口架）咋。我唔可以扮学生呀！Sir，你噉做，就即系等于带我上去一个充满毒蛇猛兽嘅火山口上便，唔理我嘅哭叫，唔理我嘅哀号，狠狠地，毫无怜悯地，将我用脚一伸，伸落去火红嘅岩浆里头。①你噉做又于心何忍呢？
王Sir：噉咪好啰，等你活得丰富，死得精彩。你唔使讲㗎（口架）喇，吟诗吟唔甩②架喇。（扐出call机）嗱，呢度有个call机表，你带住佢，见到666，即系我call你。

精句点评：
①：以连珠炮式嘅一系列状语同埋动作，以及两个夸张嘅比喻，讲出做卧底学生嘅极度痛苦。正由于比喻同动作嘅夸张而显得唔协调，所以产生搞笑效果。
②：「吟诗都吟唔甩」系粤语嘅一句常用俗语，意思即系无论如何都摆脱唔到。

Ungoo Chan@粤语协会.cn

highyun

背影（精选译段）
原文：那年冬天，祖母死了，父亲的差使也交卸了，正是祸不单行的日子。我从北京到徐州，打算跟着父亲奔丧回家。到徐州见着父亲，看见满院狼藉的东西，又想起祖母，不禁簌簌地流下眼泪。父亲说：「事已如此，不必难过，好在天无绝人之路！」

粤译：嗰年冬天，阿嫲过咗身，阿爸份工亦转埋畀人跟，眞系黑开头有条路。我由北京趯去徐州，谂住跟埋阿爸返归送殡。去到徐州见到阿爸，睇到天阶七国咁乱，又谂返起婆婆，忍唔住baa6 baa6声眼泪掂流。阿爸讲：「都定局啦，唔好咁难过嘞，好彩船到桥头自然直！」

点评：「天无绝人之路」一句，虽然系众所皆知嘅讲法，本来可直接照搬，但作者翻译时使用咗「船到桥头自然直」呢句更为地道嘅广东俚语，目的系营造一种与原文有异曲同工之妙嘅感觉，既无偏离原意，亦更好噉体现咗目标语——粤语嘅特色。

余OK@粤语协会.cn

highyun

晏
粤拼：aan3　同音字：鷃　紫光yan　全拼yan　五笔jpvf　仓颉ajv
简略解释与例子：
【1】迟：咁～先起身。
【2】中午或下午：食～（吃午饭）、～昼（下午）

余OK@粤语协会.cn

卢总

今日新鲜滚热辣，寡人嘅《失传咗嘅「十梳歌」》

 

 

原文载于：

http://general-lo.blogcn.com/diary,9949169.shtml

 

报纸登出部分有删节。

highyun

决定跟赌神学赌术（《赌侠》片段）
剧情：星仔同阿叔不甘贫穷，商量决定跟赌神高俊学赌术。

达：嗱，衰仔，话时话吖，以我哋两叔侄噉嘅人才，有咩理由喺处捱公仔面吖①？系，虽然你赢返嚟啲钱唔可以攞嚟使呀，既然系噉，你不如真真正正学赌术，到时咯喎，赢尽天下嘅黄金美女，靓车靓屋。97之后啲大佬走晒，阿叔实行做李嘉诚！
星：好啊好啊！我做郑裕玲！
达：郑裕彤啊，哼！
星：吖，系。噉我跟边个学好呢？（望到墙上赌神张相）赌——神——！？
达：冇错喇，就系赌神。只要你做咗赌神嘅徒弟，到时就可以赢到飞，赢到开巷②。以后养埋阿叔过世都得啦！
星（揽住阿叔）：阿叔！我冇话过养你噃！③

精句点评：
①：「捱公仔面」常被用于形容生活穷困潦倒。其实公仔面都几好食，不过冇益，都系少食为妙。
②：「赢到开巷」重有另一近义词「赢成条街」，即系大获全胜嘅意思。
③：当星仔深情抱住三叔，观众以为佢准备讲啲感动三叔嘅「肉麻话」，谁不知突然讲句噉嘢，真系畀佢吹胀。

Ungoo Chan@粤语协会.cn

highyun

湾
「湾」粤语读 waan1（按粤拼），有「停泊」之意。「湾」字从水，本义系湾船，但粤语引申为湾车。
元施耐庵或明初罗贯中《水浒传》第一百十三回《混江龙太湖小结义宋公明苏州大会垓》：「当夜星月满天，那十只官舡，都湾在江东龙王庙前。」
[明]冯梦龙《警世通言》第一卷《俞伯牙摔琴谢知音》：「下船之后，分付水手，但是湾泊所在，就来通报地名。」
[清]曹雪芹《红楼梦》第四十八回《滥情人情误思游艺慕雅女雅集苦吟诗》：「我们那年上京来，那日下晚便湾住船，岸上又没有人，只有几棵树，远远的几家人家作晚饭，那个烟竟是碧青，连云直上。」

余OK言外音：近读省港讲古界名嘴李我先生之著作，得知民国年间船舶靠岸亦称为「湾水」，足见「湾」之讲法由来已久，今人「湾车」正系粤语词汇活用之佐证。

余OK@粤语协会.cn（古籍考证：Dada@粤语协会.cn）

pippo

點解唔整埋我嗰啲嘅

卢总

你知道自己有嘅就自动自觉啦嘛！

阿爷话斋：自己动手，丰衣足食！

highyun

羊城抒怀
　　粤语歌开山鼻祖许冠杰先生的成名作应该是那首抒发爱港情怀的《铁塔凌云》。
笔者搭车路经广州环城高速公路白云山路段时，见白云山被公路穿过，自然生态环境遭到破坏，突发灵感，寄调《铁塔凌云》，填词如下：

 

羊城抒怀
五岭延绵　望锦绣山川变迁
富饶土地　珠江世代流不断
赵陀王墓*　闹市烟尘里现
仙羊栖处**　觅白云难复见
临江广厦　高耸云天
心仍在留恋旧沙面
西关巷陌　寻常人家寻常事
南海古城　丝绸之国丝绸路
何堪感慨话当年
舍弃乡音非吾愿
且弹且唱且怀念 且怀念

 

Highyun

 

 

好遺憾，個標題由《羊城感懷》畀人修改成《羊城抒懷》，本來心情沉重地感懷，而家變成輕鬆地抒懷，題目一改，就唔吻合歌嘅主旨。

余OK

　　最可惜嘅係喺大陸出街嘅媒體唔可以用傳統字，眼見自己五肢健全嘅正體字慘被閹割成殘體字，心中陣陣痛。

茗荷介

引用:

原帖由 highyun 於 2007-11-7 18:30 發表 粤译：嗰年冬天，阿嫲过咗身，阿爸份工亦转埋畀人跟，眞系黑开头有条路。我由北京趯去徐州，谂住跟埋阿爸返归送殡。去到徐州见到阿爸，睇到天阶七国咁乱，又谂返起婆婆，忍唔住baa6 baa6声眼泪掂流。阿爸讲：「都定局啦，唔好咁难过嘞，好彩船到桥头自然直！」

 

?

pippo

引用:

原帖由 余OK 於 2007-11-9 20:09 發表 　　最可惜嘅係喺大陸出街嘅媒體唔可以用傳統字，眼見自己五肢健全嘅正體字慘被閹割成殘體字，心中陣陣痛。

 

我有時會鑽吓空子，搏人哋睇漏眼，登咗啲傳統字出嚟，都偷過幾次雞