喺粵語協會以外嘅論壇，特別係喺嗰啲資源共享類嘅論壇浮過嘅人，都會見過「沙發」呢個詞，通常某人共享咗某啲資源，就會有啲只識索取唔識貢獻嘅CDROM（Copy Download Read Only Member）就會回帖，據聞搶到第一個回帖嘅就稱爲「沙發」。我絕對冇興趣研究點解回第一張帖會被稱爲「沙發」，只係想藉住呢個北方發明嘅網絡語言引出以下嘅內容。
英文sofa一詞，粵語譯做「梳化」，北方話譯做「沙發」。對於呢個舶來詞，本來各有各講，粵語讀so1faa2，普語讀sha1fa1，都相對與英文發音接近，正如「碧咸」與「貝克漢姆」一樣。但不知何時，廣東籍嘅CDROM亦以搶先回帖發「沙發」兩字爲榮，真係好想嗌佢哋用粵語讀「沙發」兩個字，睇下有冇人知道佢講乜。甚至平時講嘢，好多人都竟然講「沙化」，再噉落去，粵語實會全面「沙漠化」。。。。
奉勸各位講返我哋自己嘅「梳化」，唔好學壞嘴型去「沙發」，亦順帶奉勸一句，唔好做CDROM。
