舊年喺香港參加過一個介紹上環到石塘咀一帶歷史掌故嘅半日團。上環同石塘咀係香港發展得較早嘅地區，到依家重保留到好多舊時嘅風貌。不過，隨著西港島綫嘅興建，樓價上升，估計幾年之後會有好大變化。
講者係香港大學鄭寳鴻教授，佢係香港歷史掌故、收藏專家。當日個團主要為大學生而設，除咗介紹呢區嘅歷史沿革變遷以外，重包括好多粵語俚語嘅來歷，如「做雞」，「老擧」，同當時嘅色情業，茶樓業、銀行業、粵劇界嘅故事，薛覺先」點解叫「四個仙」等等。
沿著皇后大道西，聼住教授講故事，真係學到好多南粵文化，亦發現，香港開埠初期生活同省城係息息相關，一脈相承。
呢次活動嘅隨想：香港嘅本地文化（有時甚至係社區文化）有人願意做學術研究、收藏、辦「街坊團」或「學生團」傳承，講解，其實都係同香港一向本土意識強嘅呢個因素有關。 而唔係好似我哋噉，學術研究缺乏與社會互動，缺乏渠道發揚傳承，亦缺乏對生活細節嘅研究，與社會脫節，任由其散落民間，隨一代代人老去而消失，長此以往，會令對本地文化有承擔嘅人心痛莫及。
其實我諗，如果粵語協會將來有能力能聯絡到一啲年長有閲歷嘅人士，組織返啲類似歷史社區文化游蹤，show o下珍藏，俾年輕一代聽o下古仔，影o下相，順插講埋一啲俚語掌故同當時嘅生活，會對本土語言文化嘅傳承同發揚好有幫助。亦都係一種"edu-tainment"或者"info-tainment"嘅方式，寓教育、資訊於娛樂，應該係一種唔錯嘅模式。
[
本帖最後由 lhk 於 2007-12-20 00:48 編輯 ]
